dil kā kyā hai vo to chāhegā musalsal milnā
vo sitamgar bhī magar soche kisī pal milnā
vaañ nahīñ vaqt to ham bhī haiñ adīm-ul-fursat
us se kyā miliye jo har roz kahe kal milnā
ishq kī rah ke musāfir kā muqaddar ma.alūm
shahr kī soch meñ ho aur use jañgal milnā
us kā milnā hai ajab tarah kā milnā jaise
dasht-e-ummīd meñ andeshe kā bādal milnā
dāman-e-shab ko agar chaak bhī kar liiñ to kahāñ
nuur meñ Duubā huā sub.h kā āñchal milnā
Post a Comment