tera ghar aur mera jangal bhigta hai sath sath

terā ghar aur merā jañgal bhīgtā hai saath saath

aisī barsāteñ ki bādal bhīgtā hai saath saath

bachpane kā saath hai phir ek se donoñ ke dukh

raat kā aur merā āñchal bhīgtā hai saath saath

vo ajab duniyā ki sab ḳhanjar-ba-kaf phirte haiñ aur

kāñch ke pyāloñ meñ sandal bhīgtā hai saath saath

bārish-e-sañg-e-malāmat meñ bhī vo hamrāh hai

maiñ bhī bhīgūñ ḳhud bhī pāgal bhīgtā hai saath saath

laḌkiyoñ ke dukh ajab hote haiñ sukh us se ajiib

hañs rahī haiñ aur kājal bhīgtā hai saath saath

bārisheñ jaaḌe kī aur tanhā bahut merā kisān

jism aur iklautā kambal bhīgtā hai saath saath

taza mohabbaton ka nasha jism-o-jaan mein hai

taaza mohabbatoñ kā nasha jism-o-jāñ meñ hai

phir mausam-e-bahār mire gulsitāñ meñ hai

ik ḳhvāb hai ki bār-e-digar dekhte haiñ ham

ik āshnā sī raushnī saare makāñ meñ hai

tābish meñ apnī mahr-o-mah-o-najm se sivā

jugnū sī ye zamīñ jo kaf-e-āsmāñ meñ hai

ik shāḳh-e-yāsmīn thī kal tak ḳhizāñ-asar

aur aaj saarā baaġh usī kī amaañ meñ hai

ḳhushbū ko tark kar ke na laa.e chaman meñ rañg

itnī to sūjh-būjh mire bāġhbāñ meñ hai

lashkar kī aañkh māl-e-ġhanīmat pe hai lagī

sālār-e-fauj aur kisī imtihāñ meñ hai

har jāñ-nisār yād-dahānī meñ munhamik

nekī kā har hisāb dil-e-dostāñ meñ hai

hairat se dekhtā hai samundar mirī taraf

kashtī meñ koī baat hai yā bādbāñ meñ hai

tarash kar mere bazu uDan chhoD gaya

tarāsh kar mire baazū uḌaan chhoḌ gayā

havā ke paas barahna kamān chhoḌ gayā

rafāqatoñ kā mirī us ko dhyān kitnā thā

zamīn le lī magar āsmān chhoḌ gayā

ajiib shaḳhs thā bārish kā rañg dekh ke bhī

khule darīche pe ik pūl-dān chhoḌ gayā

jo bādaloñ se bhī mujh ko chhupā.e rakhtā thā

baḌhī hai dhuup to be-sā.ebān chhoḌ gayā

nikal gayā kahīñ an-dekhe pāniyoñ kī taraf

zamīñ ke naam khulā bādbān chhoḌ gayā

uqaab ko thī ġharaz fāḳhta pakaḌne se

jo gir ga.ī to yūñhī nīm-jān chhoḌ gayā

na jaane kaun sā aaseb dil meñ bastā hai

ki jo bhī Thahrā vo āḳhir makān chhoḌ gayā

aqab meñ gahrā samundar hai sāmne jañgal

kis intihā pe mirā mehrbān chhoḌ gayā

sundar komal sapnon ki baraat guzar gai jaanan

sundar komal sapnoñ kī bārāt guzar ga.ī jānāñ

dhuup āñkhoñ tak aa pahuñchī hai raat guzar ga.ī jānāñ

bhor samay tak jis ne hameñ bāham uljhā.e rakkhā

vo albelī resham aisī baat guzar ga.ī jānāñ

sadā kī dekhī raat hameñ is baar milī to chupke se

ḳhālī baat pe rakh ke kyā sauġhāt guzar ga.ī jānāñ

kis koñpal kī aas meñ ab tak vaise hī sarsabz ho tum

ab to dhuup kā mausam hai barsāt guzar ga.ī jānāñ

log na jaane kin rātoñ kī murādeñ māñgā karte haiñ

apnī raat to vo jo tere saat guzar ga.ī jānāñ

ab to faqat sayyād kī dildārī kā bahāna hai varna

ham ko daam meñ laane vaalī ghaat guzar ga.ī jānāñ

shauq-e-raqs se jab tak ungliyan nahin khultin

shauq-e-raqs se jab tak uñgliyāñ nahīñ khultīñ

paañv se havāoñ ke beḌiyāñ nahīñ khultīñ

peḌ ko duā de kar kaT ga.ī bahāroñ se

phuul itne baḌh aa.e khiḌkiyāñ nahīñ khultīñ

phuul ban ke sairoñ meñ aur kaun shāmil thā

shoḳhi-e-sabā se to bāliyāñ nahīñ khultīñ

husn ke samajhne ko umr chāhiye jānāñ

do ghaḌī kī chāhat meñ laḌkiyāñ nahīñ khultīñ

koī mauja-e-shīrīñ chuum kar jagā.egī

sūrajoñ ke nezoñ se sīpiyāñ nahīñ khultīñ

maañ se kyā kaheñgī dukh hijr kā ki ḳhud par bhī

itnī chhoTī umroñ kī bachchiyāñ nahīñ khultīñ

shāḳh shāḳh sargardāñ kis kī justujū meñ haiñ

kaun se safar meñ haiñ titliyāñ nahīñ khultīñ

aadhī raat kī chup meñ kis kī chaap ubhartī hai

chhat pe kaun aatā hai sīḌhiyāñ nahīñ khultīñ

pāniyoñ ke chaḌhne tak haal kah sakeñ aur phir

kyā qayāmateñ guzrīñ bastiyāñ nahīñ khultīñ

sham aai teri yaadon ke sitare nikle

shaam aa.ī tirī yādoñ ke sitāre nikle

rañg hī ġham ke nahīñ naqsh bhī pyāre nikle

ek mauhūm tamannā ke sahāre nikle

chāñd ke saath tire hijr ke maare nikle

koī mausam ho magar shān-e-ḳham-o-pech vahī

raat kī tarah koī zulf sañvāre nikle

raqs jin kā hameñ sāhil se bahā laayā thā

vo bhañvar aañkh tak aa.e to kināre nikle

vo to jaañ le ke bhī vaisā hī subuk-nām rahā

ishq ke baab meñ sab jurm hamāre nikle

ishq dariyā hai jo tere vo tahī-dast rahe

vo jo Duube the kisī aur kināre nikle

dhuup kī rut meñ koī chhāñv ugātā kaise

shāḳh phūTī thī ki ham-sāyoñ meñ aare nikle

shab wahi lekin sitara aur hai

shab vahī lekin sitāra aur hai

ab safar kā isti.āra aur hai

ek muTThī ret meñ kaise rahe

is samundar kā kināra aur hai

mauj ke muḌne meñ kitnī der hai

naav Daalī aur dhārā aur hai

jañg kā hathiyār tai kuchh aur thā

tiir siine meñ utārā aur hai

matn meñ to jurm sābit hai magar

hāshiya saare kā saarā aur hai

saath to merā zamīñ detī magar

āsmāñ kā hī ishāra aur hai

dhuup meñ dīvār hī kaam aa.egī

tez bārish kā sahārā aur hai

hārne meñ ik anā kī baat thī

jiit jaane meñ ḳhasārā aur hai

sukh ke mausam uñgliyoñ par gin liye

fasl-e-ġham kā goshvāra aur hai

der se palkeñ nahīñ jhapkīñ mirī

pesh-e-jāñ ab ke nazāra aur hai

aur kuchh pal us kā rasta dekh luuñ

āsmāñ par ek taara aur hai

had charāġhoñ kī yahāñ se ḳhatm hai

aaj se rasta hamārā aur hai